Questo sito utilizza cookie tecnici e di terze parti per migliorare la navigazione degli utenti e per raccogliere informazioni sull’uso del sito stesso. Per i dettagli o per disattivare i cookie consulta la nostra cookie policy. Chiudendo questo banner, scorrendo questa pagina o cliccando qualunque link del sito acconsenti all’uso dei cookie.

la-mattina-lina-c-barbagallodi Lina La Mattina - 30 aprile 2015

Nascisti sutta la peddi di lu suli di la bedda
virdi e ciarusa... CONCA D’ORU
nutricannuti di li megghiu frutti
ca criscinu sulu nall’arbula e li jardina
di cu’ li sapi cu pacenzia cultivari
e non vurrissi sbagghiari dicennu:
ca spissu e vulinteri di ‘sti frutti, n’è sazia
e china, la genti chiù semplici e sincera.

Dda’ stissa genti, c’arrisicò la vita
cummattennu cu petri e ligna, pi strati
campagni, contru mafiusi e fascisti
dda’ genti “russa” di testa, di cori
e di bannera, ca cusà pirchì, fa ancora
scantari li putenti, perciò qualcunu
sippillennu la storia sutta sarmi di sali
‘nfruschi palori, nni voli cancillari mimoria.

Cu lu tempu, lu studiu, la cunuscenza
sempri chiù russa ti si faceva l’arma
li jurnateri, li fimmini s’annammuravanu
di tia ca sempri chiù, luttavi pi dari
lu megghiu, a li figghi chiù sfurtunati
di ‘sta terra... a chiddi scurdati puru
di lu Signuri, pi non fari vriugnari d’essiri
siciliani... scanuscennu certi virità.

Forsi pi chistu, ca nni ‘sta stramma terra
d’unni tuttu s’ammuccia e s‘intrizza ‘
cu sangu e ciuri, ardicula e furmentu
alivi, e ficudinnia... ca dda’ matina
ammazzaru ‘na pasta d’omu comu a Piu
e un patri di famigghia, lassannu puru iddu
muggheri e figghi, chi cu tia sparteva
tempu, sonnu e l’arduri pi li battagghi.

Du’ omini ca nni lu sangu comu mustu
vuggheva firmentu di libirtà e giustizzia
specialmenti nni la testa di Piu c’ancora
picciutteddu finìu ‘n galera pi fari dari
la terra a cu’ l’azzappava... ca doppu
li guerri di li 20 anni tant’àutri nni fici
armatu di paci contru la guerra, contru
missili amiricani, chiantati di priputenza
davanti li nostri casi e ‘ntra li nostri paisi.

Ma ‘sti armi, ca sparanu senza fari sangu
ca lu stissu Diu dici di usari,
si non vulemu essiri peggiu di l’armala...
di solitu fannu trimari li dilinquenti
perciò scantati di la pruposta di liggi
ca spugghiava mafiusi puru di li mutanni
detti curaggiu a li cincu ‘nfami di siccari
ddu' puzzu, dda’ surgiva d’onestà, di cori
facennu forsi un favuri a l’amiricani!

E lu siccaru ddu’ puzzu, dda’ funtana
d’aperta risata, propriu la vigilia
di la “festa” d’unni ogni annu non mancavi
e la genti ca ti videva, chiù àutu di lu nomu
a vrazza aperti t’aspittava e t’aspetta
ancora, unni ‘n menzu lu sangu e lu chiantu
tra arbuli e muntagni c’è puru lu to’ ciatu,
l’ecu di la vuci purtata di lu ventu chi canta
chi forti chi mai... “Bannera russa, Bella ciao”!

Foto © Giorgio Barbagallo

TAGS:

ANTIMAFIADuemila
Associazione Culturale Falcone e Borsellino
Via Molino I°, 1824 - 63811 Sant'Elpidio a Mare (FM) - P. iva 01734340449
Testata giornalistica iscritta presso il Tribunale di Fermo n.032000 del 15/03/2000
Privacy e Cookie policy

Stock Photos provided by our partner Depositphotos