Di seguito pubblichiamo la poesia che la poetessa Lina La Mattina ha dedicato al caposcorta del pm Nino Di Matteo, Saverio Masi.
A l’omu, lu rivuluziunariu
c’a costu di la vita, virità cerca...
l’omu di ficatu ca non sciddica
perciò qualcunu ci cunzò
li “scarpi” ci giurò vinnitta...
di sfrazzusu e munzignaru
lu tinci... e comu giuda
di vinnìrisi pi 30 dinari l’accusa...
roba ca non sta
né ‘n celu né ‘n terra, ca mancu
li chiù gnuranti e senza midudda
di li chiù arritrati paisi, mai
e poi mai, mancu si a diunu
di baddottuli si ponnu agghiuttiri.
Un omu, cu occhi di lucirtuni
chi quartia li spaddi
ad autri omini ca morti vulissiru...
beddu di facci e di cori
ca sulu a taliari ntra l’occhi
a scafuniari ntra l’arma e lu pettu
ciumi d’acquazzina
cristalli di celu e funtani
pari sentiri scurriri ascutannulu...
e scusati tantu si chistu lu dici
cu’ spissu sapi cu arti
e misteri leggiri e azzappari ntra li cori.
Un omu c’ancora picciutteddu
cu cappeddu e divisa di carrubbineri
lu munnu vuleva canciari ...
mettiri ‘ngalera latri, ‘nfami
pulitici currutti, omini di putiri
chi comu agghia e crastuna
addogglianu nni la panza
perciò essennu Saverio scommiru
comu tanti autri c’altarini
vulissiru sdirrubbari,
comu scarpi vecchi li vurrissiru
ittari, mettiri a l’agnuni.
Ma la virità comu rina, dormi cueta
‘nfunnu a lu mari, misi anni
m’abbasta ca smovi cavalluna di ‘mbrogghi
e virità comu ogghiu veni a galla!
LINA LA MATTINA
Foto in alto © Giancarlo Finessi